харахад ЗҮС минь, хатгахад ЦУС минь, хайрлахад ЭХ ОРОН минь МОНГОЛ билээ

Бүсгүй минь та

no_email@coo.mn (finder) — Sun, 08 Mar 2009 21:26:00 +0800

Тэнгэр газар хоёр бие биенээ ширтдэг гэнэ лээ

Тэвчээр алдахдаа манан унагааж уулздаг гэнэ лээ

Тэнгэрлэг агуу хайрыг нь дэлхий дааж ядахдаа тэнхлэгээ тойрон эргэдэг гэнэ лээ

Тэр л хайрын эзэн БҮСГҮЙ минь та л юм шүү

Эрх чөлөө

no_email@coo.mn (finder) — Sat, 07 Mar 2009 17:07:00 +0800

Чөлөөтэй, омголон дураараа байх би дуртай!
Чөдрөөн тасдаж гүйдэг моринд адуу адуунаас хайртай!
Талын шувуу торонд бус талдаа жиргэх дуртай
Тааваараа бус орчлон өөрөө эрх чөлөөнд дуртай!
Хязгаар үгүй эрх чөлөө хаана ч харин байдаггүй
Хазааргүй унаа, бүслүүргүй гэр гэж байдаггүй
Эрх чөлөө гэж хичнээн ч хашгирлаа гэсэн
Энэхэндээ гэж хэлэхэд би хорионд байх дуртай!
Эгэл даруу ижий, эцгийн минь голомт сэтгэлийг минь хорьдог
Энгэртээ тэвэрсэн үр, насны минь хань намайг хорьдог
Элгэн садан ард түмэн, Эх орон минь намайг хорьдог
Энэнээс илүү эрх чөлөөгөөр орчлонд би яах юм бэ?

Нэгэн номонд дурлачихлаа...

no_email@coo.mn (finder) — Sat, 07 Mar 2009 04:27:00 +0800

2009 оны 3 сарын 6-нд дүүгийнхээ ширээн дээр байсан Л.Өлзийтөгсийн "Нүдний шилэнд үлдсэн дүрсүүд" гэдэг номыг санаандгүй нээж үзээд шөнийн 3 хүртэл бүтэн 6 цаг, 2 удаа уншлаа. Дахиад л уншаад баймаар ... Энэ номонд дурлачих шиг боллоо... Хэхэхэ сая нэт ухайж байсан чинь Л.Өлзийтөгсийн өөрийнх блог http://fohlen.blog.banjig.net/ -ийг олж үзээд бөөн баяр болоод сууж байна.
Товшуур нэгт ахан дүүс та бүхэн энэ номыг нэг уншаад үзээрэй... нэг л өөр сэтгэгдэл төрөх бии вий...

Анхны оролдлого...

no_email@coo.mn (finder) — Thu, 05 Mar 2009 04:37:00 +0800

Ямар ч байсан анхны оролдого маань бүтэх шиг боллоо.

Очирбатын Дашбалбар... Энэ их хүн Монголын төлөө цохилох зүрхтэй, булгилах халуун цустай нэгэн байсан гэдэгийг хэн бүхэн мэдэх буй заа. Орчлонд сайн хүн болж төрж гэмээ нь ахархан хугацаанд, яарсан юм шиг хийх ёстойгоо хийчихээд түрүүлж буцдаг жамыг яалтай ч билээ. Магад энэ их хүн бурханы оронд илүү хэрэгтэй болсон я юм билүү ...

Бодоод байх нь ээ эх орон гэж хаахна байдаг юм бэ?
Эхээс төрөхөд минь тосож авсан тосон бор газар шороо минь, энэ орчлонгоос буцахад минь халуухан хэвлийдээ энхрийлэн тэврэх алтай өлгий минь...
Хүү нь болж мэндэлсэн азтай миний зүрхэнд, сэтгэлд, цусанд... , ... цэнхэр гаригийн цээжинд ... оршном бус уу.

Эх оронч байна гэдэг "Би эх оронч хүн" гэж цээжээ дэлдэхийн нэр бус, харин өөрийн хамгийн сайн хийж чадах зүйлээ хамгийн сайн хийж чаддаг байхын нэр гэд бодож, хичээж л явна даа...

О.Дашбалбар : Галав эриний зөнч

no_email@coo.mn (finder) — Thu, 05 Mar 2009 04:34:00 +0800

Долоон бурхан одод залхуутайяа гялалзах
Долдугаар сарын цатгалан өдрүүдэд би дургүй
Ороо салхи хүнгэнэн урхирч, орсон буур шиг тэнгэр хүрхрэх
Орог буурал өвлийн хоёрдугаар сард би дуртай
Орвонгоороо дүнгэнэх уулс одоохон нисэх нь гэмээр
Орчлон хорвоо доргиж тэнгэр дээрээс нурах нь гэмээр
Одод жингэнэн бууж, хорвоогоор нэг цацагдах нь гэмээр
Одоо л ертөнцөд галав юүлэх нь гэмээр
Хоёрдугаар сард л дуртай

О.Дашбалбар : Монголоо муулж харийнханд бөхөлзөгсдөд!!!

no_email@coo.mn (finder) — Thu, 05 Mar 2009 04:30:00 +0800

Түмэн минь мөхөхийг чи үзэхгүй
Үнэн минь алдрахыг чи үзэхгүй
Үлгэр минь дуусахыг чи үзэхгүй
Төрөл минь тасрахыг чи үзэхгүй
Соёмбо минь бүдгэрэхийг чи үзэхгүй
Соёл минь солигдохыг чи үзэхгүй
Онон минь ширгэхийг чи үзэхгүй
Олон минь зовохыг чи үзэхгүй
Хэнтий минь намсахыг чи үзэхгүй
Хэрлэн минь татрахыг чи үзэхгүй
Хийморь минь доройтохыг чи үзэхгүй
Хойморь минь ханхайхыг чи үзэхгүй

Сүлд минь унахыг чи узэхгүй
Сүнс минь дээшлэхийг чи үзэхгүй
Сэтгэл минь сэвтэхийг чи үзэхгүй
Сэрэмж минь алдрахыг чи үзэхгүй
Ухаан минь самуурахыг чи үзэхгүй
Учирсан минь салахыг чи үзэхгүй
Эв минь эвдрэхийг чи үзэхгүй
Эзэн минь залрахыг чи үзэхгүй
Дуу минь саарахыг чи үзэхгүй
Дуулиан минь тасрахыг чи үзэхгүй
Балчиг шавар дундаас нь
Бадамляньхуа ургадаг юм
Баруун шугуй дунд нь
Цагаан хус хяралз...

[дэлгэрэнгүй]

О.Дашбалбар : Агсам тавимаар хорвоо

no_email@coo.mn (finder) — Thu, 05 Mar 2009 04:25:00 +0800

Сэтгэлийн минь цог унтраагүй сэрүүн ахуй үедээ
Сэргэлэн болжмор шиг эмсэж, дур зоргоороо явлаа
Тэмцэлдэж явсан хүмүүсийн тэн хагас нь алга даа
Тэрсэлдэж үлдсэний гавьяа, ертөнцөд шунахаас хагацлаа
Уйтгар гунигтай хорвоод уруудаж доройтож явсан ч
Угийн хатуу тавилан минь өгсөж өөдөлж үзлээ
Дэлхийн бөмбөрцгийг өшиглөж агсам тавимаар санагдана
Дээр нь байгаа амьтдын нэг нь би өөрөө юм шүү дээ

Өөрийн блогтой болох анхны оролдлого...

no_email@coo.mn (finder) — Thu, 05 Mar 2009 03:35:00 +0800

Өнөөдөр яаагаад ч юм сэтгэл гэгэлзээд ч байгаа юм шиг, эсвэл гуниглаад ч байгаа юм шиг нэг сонин байна. Тэгээд ер нь кибер орон зайд өөрийн гэсэн жижигхэн ч хамаагүй булан олж авий гэж шийдэн энэхүү үгсийг тэрлэж сууна. Хэдийгээр миний бие интернэт гээч дамшигтай анх учираад 10 гаруй жил үерхсэн офицер болох дөхөж яваа ч гэсэн блогт бол шинэхэн цэрэг өнөөдөрөөс эхлэн элсэж байна.
Эрхэм товшуур нэгт анд нөхөд, ахан дүүс та бүхний үнэтэй зөвлөгөө над мэтийн шинэхэн цэрэгт үнэлж баршгүй зүйл гэдэгийг хэлэх байна. Ингээд ямар ч байсан энэ гэр бүлийн идэвхитэй гишүүн нь байхын тулд чадлаараа чармайхыг л хичээнээ дээ.